Na Bin Zongo. msimu ndio huu
msimu wa siku kuu
msimu wenye makuu
masikini sina changu.
msimu wa usaliti
msimu watashtiti
msimu wa yakuti
masikini sina changu
msimu flani wa adha
fahari na nyingi bugdha
msimu wakuumiza
masikini sina changu
msimu wakupendeza
msimu wakuchombeza
msimu wakuumiza
masikini sina changu
msimu huu wataka
kula kunywa nakusaza
na pesa zakusakata
masikini sina changu
msimu wanisaliti
wahuba hanitaki
ataka mlimani city
masikini sina changu
mavazi ya kifahari
ataka kupanda meli
visiwani kuvinjari
masikini sina changu
msimu wataka nyama
kama samaki jodari
mfukoni pesa sina
masikini sina changu
mialiko nayo mingi
tatizo langu nauli
hali yangu siipingi
masikini sina changu
gharika limenipiga
katika mifuko yangu
ukata umenizonga
masikini sina changu
msimu huu adimu
wafaa kupokelewa
ila pesa ni muhimu
masikini sina changu
wazuri wote mashem
mie nitawapa nini
sina pakwenda sehem
masikini sina changu
mivinyo yakila aina
clabu yapatikana
tatizo pesa sina
masikini sina changu
melala kama mgonjwa
mialiko nakataa
hali ngumu yaniponza
masikini sina changu
menuniwa na azizi
wahuba wangu mpenzi
kosa langu sina benzi
masikini sina changu
alitaka kuzunguka
viwanja vyote kufika
msimu kufurahika
masikini sina changu
tatizo kukosa vocha
na pesa ya bajaji
mwenzenu yamenifika
masikini sina changu
hii hali kwani vepe
mbona napata mapepe
mie pekee au wote
masikini sina changu
huu upole sio wangu
hali ya uchumi wangu
ndio yanipa machungu
masikini sina changu
Siku kuu shikamoo
masikini umenipatia
nabaki kusema loh!
masikini sina changu.